Klompen maeke me van populier'out en wilg'out. De bômen die a
me verwerke bin ongeveer 30 jaer oud en 't is verplicht om
nieuwe vrom te planten. De productie bestaèt uutslutend uut
Nederlands 'out. De stammen worre binnen een jaer verwerkt.
Vers 'out geef d' een moaie gladde 'witte' klompe.
Mie de afkortzaege worre bollen ezaegd, die a  net zô lank bin
as a een klompe mô worre. Van de afkortzaege gae de bollen,
naè de lintzaege. Daè worre de bollen in 'taartpunten'  'ezaegd.
Ier worre ok glieke de knoesten en schoren wig'ezaegd.
Dan zet de zaeger die punten op het richtmesien en freest ze
uut toet 'klompebroadjes'. Vervolgens gae de broadjes naè
de klompekopieermesiene. Dat apperaat kopieert via een malle
een paer klompen. De klompen  bin dan an de butenkant klaer.
Van het kopieermesien gae de klompen dan in een boormesien.
Ier kriege ze mie behulp van een malle de goeie pasvurm.
Daè bin 38 maeten. Voe elke maete è me een een aparte serie
mallen, viere voe eên maete.
Dat kopieermesien maèkt, van de groaste toet de kleinste maete,
35 toet 60 paer klompen per ure. A 't mesien in'esteld mô worre van
d' eêne maete naè een are maete dan is dat een vollen dag werk.
De lengte, breêdte èn  dikte van de zeule wor toet op de milimeter
nauwkeurig af'esteld. Nae aol dat gezaeg en geboor gae de klompen
zô'n tien toet veêrtien daegen de drôôgkaemer in. Daènae worre
de klompen van binnen en van buten 'eschuurd. Het schuren van de
binnenkant is nie alleêne voe de moaigheid, mae veraol ok om een
gladde, klompe te kriegen die a eêl lekker zit. De butenkant wor
'eschuurd om 'n moai te kriegen. Een deêl van de gemaèkte klompen
wor 'eschilderd. Dat gebeur mie verve op waeterbasis in verschillende
kleuren. Geel is de traditionele kleure en ok het meêst 'eleverd.